i bi nes ching vo däm land, bines lokauprodukt,

i weis wohär i ga, i weis o gnau wohär i chum

bi nid vom ersten ougust, wüu denn isch nüt passiert

wo üs betrifft, wennscho simer ching vo 1848

riisegschicht, doch rütli chunt dört nid vor

chriege öfter gägenang aus mitme böse frömde vogt

ke armbrust wüu habsburg si denn verbündeti

wes gessler u tell hätt ggä, wäre si besti fründe gsi

hei bünd gschlosse, broche, wider erneuert

si denn o eidgenosse vo Schwaben und vo Savoyer

was üs verbindet ir Schwyz, sit 1300

für ds haube jahrtuusig isch dr export vo üsne chinder

verchoufe ganz europa soudate, mir wei verdiene

kämpfen i JEDEM chrieg, für gäut, uf BEIDNE sitte

500 jahr lang si mir bezauti barbare

mit hellebarde wo aues abfackle i frömde länder

I bi stouz uf üsi gschicht, üse wäg

Mir si ds viufäutigste land wo’s git uf dr wäut

Wüu mer dä wäg o nie alei ggange si

Mir si teil vomne ganze ob mers wei oder nid

Klar bini stouz uf üsi gschicht, üse wäg

Mir si ds viufäutigste land wo’s git uf dr wäut

Mir si frei hüt, mir wäre nid frei ohni si

Mir si teil vomne ganze ob mers wei oder nid

Hüt simer souverän, neutrau, me würdsis nie gä

Aber denn wird üses land no prägt vo bürgerchriege

schliessen allianze mit ussländische mächt

und zie gmeinsam id schlacht gäg angeri schwyzer städt (1442)

i bi sohn vom waadtland sit aafang vom stammboum

wärde wi ds aargou eroberet vom bärner landvogt

hei stüüre zaut u bi wahle nid dörfen antworte

wart, chunt dr das irgendwie bekannt vor?

U Bern het üsi Chnächtschaft nie usenang gno

Si nach 300 jahr befreit worde vo de franzose

doch mini ching wärde bärner, u dasch normau so

si wählen iri sprach, religion, ire standort!

Und d’hiuf vo usse hettis immer wider grettet

Ohni schlichtig hättemer is gägesittig abegmetzlet

Sit 1803 dank emen ussländer fride hei

Was üs scho sit immer usmacht isch üsi verschideheit

När sisi cho di italiener, di albaner u di tscheche,

di türrge mit irne döner

Irne nid anerkannte qualifikatione

Irer arbeitschraft, irne biiträg i millione

frag di ob migration für üsi wirtschaft schlächt sig:

I 30 jahr si 2/3 vo de schwyzer über 60gi

Mau luege wis denn usgseht wemer gränze schliesse

ob di pensionierte dr lade schmeisse u d’Ränte fliesse

de säg de dütschen itz si söue zrügg

aber je nach kanton bisch lenger teil vo irer gschicht gsi

aus teil vo dr schwyzer

Säg ne si söue zrügg de libanese

Ohni si wär d’uhrenindustrie für immer i de ferie

Säg ne si söue zrügg de hugenotte

Wo ir ufklärig si cho und hie ds lokaugwärb ufbout hei

Gang zu dine fründe und verzell das:

Di erste Helvete si dahärezogen usem Elsass.

Text von Greis.